يوميات صيدلي 1(فلتحيا الانتراكشن)
مريضة معتادة في الصيدلية ، يمكن بتيجي كل اسبوع و لا حاجة و ديما باين عليها الاجهاد و التعب ، طبعا قرون الاستشعار الفضولية بتاعتي بدات تلعب و تحاول تعرف هو في ايه بالظبط ،الصيدلي اللي معايا راح يجيب لها دواء ناقص من صيدلية تانية لانها زبونتنا و مينفعش متخدش الدوا من عندنا ، المهم انا لقيتها فرصة اعرف هو في ايه بالظبط...
سالتها هو الدكتور راح يجيب لك ايه ؟
-ماريفان
و طبعا نظرا لجهلي اللي لسه مستمر بمعظم الادوية دورت على الكمبيوتر الماريفان ده ملته ايه بالظبط و لقيته وارفارين warfarin
فسالتها : هو انتي بتاخدي الدوا ده على طول؟
-من ساعة العملية
-عملية ايه؟
-تغيير صمام و توسيع صمام
-و هتفضلي تاخديه لحد امتى ؟
-لحد ما اموت.
-لا اله الا الله طب وبتاخدي معاه ايه؟
-لانوكسين
و طبعا اتبعت نفس الخطوات مع اللانوكسين لقيته ديجوكسين digoxin
وهنا ظهرت تفاصيل الموضوع كله لوحدها ، المريضة دي عندها مشكله في القلب من و هي صغيرة و ده عملها شكل من اشكال ال chf
و لما كبرت عملت العمليه و طبعا الصمامات الجديدة محتاجة ادوية مانعة للتجلط طول العمر .
و هنا دارت في راسي فجأة أسخف محاضرة انتراكشن في الحياة
digitlais interaction
المحاضرة دي كانت اصلا مطلعة روحي فقولت بقى نتذكر سويا انا و المريضة الهتي بتاع الكلية.
فسالتها:
-انتي بتاخدي علاج ايه تاني.
- قالتلي انا مباخدش اي علاج غير لما اكلم دكتور القلب بتاعي حتى لو صداع ، لازم هو يقولي و لو رحت لدكتور تخصص تاني لازم اقوله على الروشته قبل ما اصرفها.
اخيرا حالة واحدة في الصيدلية حسستني باني صيدلي مش بقال افرنجي.
كفاية بس الواحد من هنا و رايح يبص في اي روشتة هي بتصرفها و الدنيا هتبان لوحدها.
يلا ...
ربنا يشفي كل المرضى ...
و لتحيا الانتراكشن.
Comments
Post a Comment