حسام -تنين- الصعيدي


التنين صديقي ... والله اسم مش بطال برده ، او ممكن تقول انه اسم جامد تنين ...

طبعا لاني بحب الصفة دي الا وهي صفة التنين اي الجامد جدا ، فمؤخرا زي ماتقولوا كده لزقت في لساني ، و بقت كل حاجة بالنسبة لي تنين، زي مثلا المشوار جامد تنين، البنت دي حلوة تنين، المخلوق ده مخلوق فاكس تنين و كده يعنيو انا مش شايف في ده حاجة وحشة على الاقل مش كلمة بذيئة زي اللي ممكن الواحد يستبدلها في وصف الاشياء اللي بتعجبه ، اكيد كله فهم انا قصدي على ايه...و لو مفهمتش تبقى انت مؤدب تنين.


المهم ... نتيجة الكلمة دي كتير تنين فقدد قرر أصدقائي الشباينة عليهم رحمة الله -طبعا الرحمة بتجوز عالميت والحي - انهم يسموني حسام تنين، الظريف في الامر ان اصحابي في الصيدلية اطلقوا نفس الاسم بشكل او باخر في نفس الوقت فبقى د يامن مبيقولشغير حسام بتاع التنين و يضحك جدا لما ابقى معاه و ييجي اعلان راديو ميجا هيتس و يقول ايه الحفلة التنين دي.

ممكن يكون ده اكتر لقب او كنية -حلوة كنيه دي-  طلع لي على مر الزمن ظريف تنين، انا بحب التنين ، ومش شايف انه كلمة عيب، وبعدين تنين دي كلمة ممكن اهيس بيها مع اصحابي في اي حتة و ادام اي حد بدون اي احراج ، بيس يعني.

و كأحد مشجعي التنانين او محبي التنانين كما يسميني ابراهيم باشا ابو زهرة فقعدت ادور على تاريخ التنين ، هو طبعا كائن خرافي مهول موجود في الاساطير الصينية و الاوروبية، احيانا يظهر كرمز للخير و احيانا رمز للشر و احيانا مثال الحكمة و خاصة عند اهل المشرقو كل ده يعني انه مخلوق جامد تنين.

و انا من موقعي هذا احيي كل التنانين اللي في الدنيا و كل محبي التنين و كل اصدقائي الجامدين تنين
و دمتم

Comments

Popular posts from this blog

Collateral beauty

اسكندرية،،، ليه؟!

يا منفي