جده غير

دايما كنت بسمع كلمة جده غير بس مكنتش اعرف يعني ايه او قاصدين بيها ايه؟!

يعني ايه غير و ليه بيعتبروها بلد مميزه عن باقي المملكة

اخيرا لما جيت هنا عرفت هي ليه غير؟؟؟؟!

يمكن كنت قلقان جدا من صدمة تغيير الثقافة و الجو و الاشخاص اللي هتعامل معاهم لما اجي هنا بس الحمد لله فاقت جده كل توقعاتي .

يمكن يكون من حسن حظي اني جيت في الوقت ده من السنة لانهم بيقولوا ان ده احسن جو لجده ، المهم ان اول مكان اقعد فيه هنا كان جوه رائع و بعد كده يحلها حلال

الجو افضل بكتير من جو مصر في الوقت ده من السنة لا برد و لا حر و مطر خفيف من آن لآخر حاجه يعني هنا و حتى نسبة الرطوبة مقبولة جدا.

اللطيف بقى في جده هو تركيبها ، تحس انك في اسكندرية ، باتمشى عالكورنيش و اقعد على الصخور اللي الموج بيضرب فيها ، حاجه يعني هنا.

كل ماركب تاكسي اقعد اتكلم مع السواق عن بلده سواء سريلانكا أو باكستان أو اليمن ، جنسيات عمري ماتعاملت معاها.

اخرج الف في مولات او اجرب الاكل السعودي او اتفرج على العربيات اللي عمرها ماشفتها في مصر.

بشكل عام جده بلد جميلة جدا و الحمد لله اني بدأت حياتي هنا في بلد و جو بالشكل ده.

Comments

Popular posts from this blog

Collateral beauty

يا منفي

A good movie !