صالون شحاته 2 .. إسلام البري



أو إسلام الكيرلي .. بصوا بقه .. مستحيل اتكلم عن البري باللغة العربية الفصحى ، و ده مش لجهله مثلا - اكيد لا طبعا- بس لانه شخصية مينفعش تتكلم عنها غير عادي ، في البيس كده ، يمكن لانه شخصية انا عن نفسي شايف انها مصرية زيادة عن اللزوم فلازم اتكلم عنه مصري بلدي و من غير اي قيود.

البري ده يا جدعان كوكتيل غريب جدا صعب تلاقيه في اي حتة، جدع جدا جدا جدا و في نفس الوقت ندل تنين، احيانا ممكن تقرا كل حركة بيعملها و تتوقع الحركة الجاية ، و احيانا يتحول الى لغز مقفول على نفسه و لو اشقلبت مش هتفهم هو بيعمل كده ليه و ايه اهدافه من ورا التصرف ده.

بصوا هو انا هحاول اوصفه في كلمات بسيطة زي مانا شايفه كأحد أركان الصالون الركيزة - عدوا الركيزة دي- و ليوفقني الله الى الصواب.

ذكي جدا..
خبيث تنين ..
مدخن قدير ..
أهلاوي متعصب ..
مؤدب جدا ومعظم الوقت بيسيبها ..
صريح الى حد البجاحة وكتوم الى حد الغموض ..
عارفين اللي هوه يعرف يقراك سهل جدا و يعرف انت عاوز ايه..
بيحسب خطواته جدا قبل ما يعملها ..

مش عارف هو حاجات كتير جدا في بعض صعب المها مرة واحدة، بس في مواقف ليه معايا او مع غيري صعب جدا انساها.

مثلا مثلا مثلا ، يوم ما قعد نعايا للساعة 7 الصبح لحد ما الاقي عربية لمنوف ، ويوم ما كنا بنتبادل عيوبنا صراحة ... قالي على عيب كده محدش قبل كده خالص قالي عليه مع انه واضح فيه جدا جدا بس هو الوحيد اللي قاله ، ده طبعا غير مواقف كتيره جدا جدا ، يمكن لانه شخص اي كلمة بيقولها في الغاااالب بيبقى لها معنى و سبب و وجهة و طبعا الكلام في صالون شحاته و غيره كان اكتر من اني اذكر كل مواقف البري اللي معلقه معايا.

من الاخر البري ده من اجدع الشخصيات اللي قبلتها في حياتي و اذكاها ... بجد شخصية مصرية جدا جدا جدا

بجد انا سعيد اني عرفت حد كده و ان كان متاخر و بجد بدعي ربنا يطول في عمر صدقاتنا على اد ما هيطول في اعمارنا....

يتبع>>>>

Comments

  1. اسلام البرىMonday, September 27, 2010

    انا عاوز اقولك كلمتين يا حسام من الاخر :
    اولا : بشكرك على الكلام الجميل دا.
    ثانيا :طالما احنا قلنا اننا اصحاب يبقى كلمه المجدعه والمرجله يبقى دا شئ مفروغ منه .. مفروغ منه وضرورى مدام قلنا اصحاااااااااااااب ...
    ناس كتير ممكن ماتشوفنيش زى مانت بتقول بس دا عشان هما مش عاوزين يشوفوا كدا وانا ماشى بالمبدأ دا ف حياتى ان مش كل حد يستحق يشوف اللون الطيب بتاعك وانت الشخص الوحيد اللى بيحدد الناس اللى تعرفك على حقيقتك .
    وانا يشرفنى انك انت يا حسام واحد من الناس اللى اخترتهم للسبب دا ..

    ReplyDelete
  2. لا لا لا انا مقدرش عالكلام ده يا بررو
    و عموما
    ربنا يخليك يا معلم و انا يشرفني و يسعدني اني ابقى حد من اللي انت اخترتهم دول

    ReplyDelete

Post a Comment

Popular posts from this blog

Collateral beauty

اسكندرية،،، ليه؟!

يا منفي