مش عارف

حاليا انا في حالة نفسية غريبة جدا ، يمكن يكون سببها اني بقالى كتير - مش كتير اوي -مش بخرج في الهوا ، ممكن انا اول ما بخرج شوية في الهوا بخرج على طول من الحالة دي ، بس بمجرد ما ادخل البيت تاني ترجع لي نفس الحالة دي ، ممكن يكون ده السبب في سفري القاهرة و اسكندرية اكتر من مرة الاسبوعين اللي فاتوا ، برده مش عارف ، هو كوني محطم نفسيا بشكل كبير فده شئ أكيد
as they say : totally screwed up
هي دي حاجة انا عارفها ، بس اللي انا مش عارفه ليه انا بقى لي فترة قادر اتحكم في نفسي و ابعد عن الحالة دي بس بمجرد ما اثبت في البيت و خصوصا ان انا البيت بالنسبة لي مش اكتر من الفرجة على افلام امريكي على الكومبيوتر او التلفزيون ، انا حاليا حاسس ان انا
a walking little version of IMDB

قعدت من شوية انزل اغاني التسعينات اللي كنت متعود اسمعها زمان مع ماما الله يرحمها ، محمد الحلو و ايمان البحر درويش و انغام و علي الحجار ... عارفين انتو الناس اللي اختفت دي بجد اغانيهم مازالت بتحمل نفس الاحساس و المعنى بتاعها مع زيادة المعاني لزيادة التجارب عبر 10 11 سنة فاتوا، بس لسه بحب اغنية يا وابور الساعة اتناشر بتاع ايمان البحر و لسه بموت في اغاني انغام بتاع زمان و ميادة الحناوي....
الاغاني دي بتديني احساس كده....مش عارف...احساس غريب بالاصالة و ان انا انسان ذو جذور بشكل او باخر ... مش عارف ليه.

ساعات احس اني نسيت سبب الموضوع او سبب الحالة دي بس برجع اكتشف اني مش اكتر من اني بضحك على نفسي ...
مش عارف
ساعات بيرجع لي احساس الاهانة والجرح و الاستهانة بيه و بمشاعري مرة تانية و بشكل مرير جدا محصليش ساعت الحدث ده اصلا...
مش عارف
ساعات بحس اني ممكن اكون ظلمت حد في طريق الحفاظ على كرامتي اللي حسيت و حاسس لسه انها اداست ...
مش عارف
ساعات بحس انه مش بمزاجي ظلم الاخر و ان انا اتظلمت فابسط حق ليه عند نفسي اني محاسبهاش على ظلم الاخر ...
مش عارف

انا حاليا بسمع احمد الحجار في اغنية عود وعايش في حالة غريبة جدا و ربنا يعمل اللي فيه الخير


حسام

Comments

Popular posts from this blog

Collateral beauty

اسكندرية،،، ليه؟!

يا منفي